​A PAM é unha asociación de profesionais do sector da danza e das artes do movemento creada dende sentires, afectos e desexos comúns de acompañar e reinvidicar a dignidade do tecido profesional da danza en Galicia.

 

Somos unha rede ampla e diversa de profesionais independentes, compañías, asociacións, espazos de creación, festivais, docentes, xestoras culturais e coreógrafas. 

Traballamos de xeito coordinado e democrático para garantir a interlocución e presenza do sector no seu contexto e horizonte político-social-cultural galego.

 

Dende a nosa visión plural apostamos pola potencialidade do encontro e interconexión frente aos desafíos estruturais aos que nos enfrontamos actualmente.

 

 

​

​

​

 

​

​

A PAM é froito dun proceso de movilización e acción colectiva que ten orixe en 2019 coa PACCG (Plataforma de Afectadas polo Centro Coreográfico Galego), creada para denunciar a parálise, opacidade e desmantelamento no que se atopaba o CCG na última década.

 

Este aglutinamento de profesionais impulsa a creación dun colectivo sectorial e espazo de reflexión máis alá das reivindicacións orixinais, conformándose como Plataforma de Artes do Movemento. 

 

Este proceso culmina no 2023 coa creación e constitución da Asociación de Profesionais das  Artes do Movemento de Galiza.